ترے جلوؤں کے آگے ہمّتِ شرح و بیاں رکھ دی

غزل| اصغرؔ گونڈوی انتخاب| بزم سخن

ترے جلوؤں کے آگے ہمّتِ شرح و بیاں رکھ دی
زبانِ بے نِگہ رکھ دی نگاہِ بے زباں رکھ دی
مٹی جاتی تھی بلبل جلوۂ گل ہائے رنگیں پر
چھپا کر کس نے اِن پردوں میں برقِ آشیاں رکھ دی
نیازِ عشق کو سمجھا ہے کیا اے واعظِ ناداں!
ہزاروں بن گئے کعبے جبیں میں نے جہاں رکھ دی
قفس کی یاد میں یہ اضطرابِ دل معاذ اللہ!
کہ میں نے توڑ کر ایک ایک شاخِ آشیاں رکھ دی
کرشمے حسن کے پنہاں تھے شاید رقصِ بسمل میں
بہت کچھ سوچ کر ظالم نے تیغِ خوں فشاں رکھ دی

الہی! کیا کیا تو نے کہ عالم میں تلاطم ہے
غضب کی ایک مشتِ خاک زیرِ آسماں رکھ دی


پچھلا کلام | اگلا کلام

شاعر کا مزید کلام