فروزاں ہر گھڑی نامِ نبیؐ ہے

اسی سے کائناتِ دل سجی ہے

ہمارے دل کی دنیا میں تمہیں سے

اجالا ہے ضیا ہے روشنی ہے

بہاریں ہیں تمہارے دم قدم سے

تمہیں سے اس جہاں کی دل کشی ہے

ہرا تم سے ہے نخلِ آرزو اور

عقیدت کے شجر میں تازگی ہے

درودوں سے مجھے سیری ہو کیوں کر

اسی سے انبساطِ دائمی ہے

تمہارے نام کی لذت نہ پوچھو

حلاوت ہے کشش ہے دل بری ہے

محبت کے کرشمے بھی عجب ہیں

جدائی ہے تڑپ ہے بے کلی ہے

کسی پہلو قرار آئے نہ تم بِن

دلِ مضطر ہے اشکوں کی جھڑی ہے

تمہاری مدح میں سمعانؔ ہے گم

یہی اس کی متاعِ آگہی ہے