اشک زیادہ سینے میں کم آنکھوں میں

دل میں ایک سمندر شبنم آنکھوں میں

تعبیروں کی رُت جانے کب آئے گی

مدت سے ہیں خواب کے موسم آنکھوں میں

قطرہ قطرہ ڈھلتی ہیں پَر جلتی ہیں

درد کی شمعیں مدھم مدھم آنکھوں میں

راہ کہاں سے پاتے ہیں کیوں آتے ہیں

ہنستے ہنستے آنسو یک دم آنکھوں میں

منہ مانگی ساری ہی خوشیاں ہونٹوں پر

پھر بھی انجانے سے کچھ غم آنکھوں میں

سب منظر جانے پہچانے لگتے ہیں

رہتا ہے اک خواب کا عالم آنکھوں میں