حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

آ گیا ماہِ صیام

نظم| مولانا محمد ثانی حسنی انتخاب| بزم سخن

آ گیا ماہِ صیام
لے کے رحمت کا پیام
روح پرور روز و شب
برکتوں کے صبح و شام
اک بہارِ جاں فزا
آ گئی مستِ خرام
ہر قدم نور و سرور
ہر نفس صدقے مشام
رحمتیں ہی رحمتیں
مغفرت کا اذنِ عام
وا ہوئے جنت کے در
آتشِ دوزخ حرام
شر ذلیل و خوار ہے
ہیں شیاطیں زیرِ دام
دل میں مستی جذب و شوق
لب پہ پاکیزہ کلام
دن کو روزہ کا عمل
رات کو ذکر و قیام
سحری و افطار کا
انتظام و اہتمام
روزہ داروں کا یہی
مشغلہ ہے صبح و شام
اک سراپا خیر شب
ہے شبِ قدر اس کا نام
لیلۃِ عفو و کرم
فجر تک امن و سلام
مژدۂ رحمت لئے
برکتوں کے لے کے جام
صف بصف روح و ملک
ہوتے ہیں نازل تمام
طالبِ خیر و کرم
اٹھ کے لے کاس الکرام
کر لے اپنی آج تو
مغفرت کا انتظام
لے کے رحمت کی بہار
آ گیا ماہِ صیام

پچھلا کلام | اگلا کلام

شاعر کا مزید کلام