سر میں سودا بھی نہیں دل میں تمنا بھی نہیں

لیکن اس ترکِ محبت کا بھروسا بھی نہیں

دل کی گنتی نہ یگانوں میں نہ بیگانوں میں

لیکن اس جلوہ گہِ ناز سے اٹھتا بھی نہیں

شکوۂ جور کرے کیا کوئی اس شوخ سے جو

صاف قائل بھی نہیں صاف مکرتا بھی نہیں

مہربانی کو محبت نہیں کہتے ائے دوست!

آہ اب مجھ سے تری رنجشِ بے جا بھی نہیں

ایک مدت سے تری یاد بھی آئی نہ ہمیں

اور ہم بھول گئے ہوں تجھے ایسا بھی نہیں

آج غفلت بھی ان آنکھوں میں ہے پہلے سے سوا

آج ہی خاطرِ بیمارِ شکیبا بھی نہیں

بات یہ ہے کہ سکون دل وحشی کا مقام

کنج زنداں بھی نہیں وسعتِ صحرا بھی نہیں

ارے صیاد ہمیں گل ہیں ہمیں بلبل ہیں

تو نے کچھ آہ سنا بھی نہیں دیکھا بھی نہیں

آہ یہ مجمعِ احباب یہ بزمِ خموش

آج محفل میں فراقِؔ سخن آرا بھی نہیں