فریبِ خندۂ پیہم کسی کو کیا معلوم

بپا ہے دل میں جو ماتم کسی کو کیا معلوم

میں ہنس رہا ہوں بظاہر مگر مرے دل پر

گزر رہا ہے جو عالم کسی کو کیا معلوم

بیانِ حال بصد احتیاط ہے منظور

رموزِ گریۂ کم کم کسی کو کیا معلوم

لبوں تک آ کے چھلک جائیں جس سے پیمانے

اُس اک نگاہ کا عالم کسی کو کیا معلوم

یہ حسنِ سادہ و معصوم ہے نظر کا فریب

مزاجِ گیسوئے برہم کسی کو کیا معلوم

چمن کے لوگ فدا ہیں تبسمِ گل پر

پیامِ گریۂ شبنم کسی کو کیا معلوم

اِسی پہ دامنِ رحمت کو ناز ہے اقبالؔ

مقامِ دیدۂ پُرنم کسی کو کیا معلوم