مخدومؔ محی الدین

اردو زبان کے مشہور انقلابی شاعر مخدوم محی الدین کا اصل نام ابو سعید محمد مخدوم محی الدین قادری اور تخلص مخدوم تھا۔

آپ کی پیدائش 04/ فروری 1908ء کو سنگاریڈی تعلقہ اندول ضلع میدک حیدر آباد دکن موجودہ تلنگانہ میں ہوئی ، مذہبی گھرانے کے ہونے کی وجہ سے آپ نے دینیات کی تعلیم پائی اور اس کے بعد جامعہ عثمانیہ سے بی اے اور ایم اے کی ڈگری حاصل کی ، اس کے بعد آپ سٹی کالج کے شعبہ اردو سے وابستہ ہوئے ، آپ ایک زود گو شاعر نہیں تھے ، آپ نے زیادہ تر پابند اور آزاد نظموں میں طبع آزمائی کی ، اس کے علاوہ قطعات ، رباعی اور غزلیں بھی لکھیں ، "سرخ سویرا" ، "گل تر" ، "بساط رقص" آپ کی تصانیف ہیں ، آپ کو 1969ء میں ساہتیہ اکادمی ایوارڈ سے بھی نوازا گیا۔

مخدوم ہندوستان کی ادبی ، علمی ، سماجی اور تہذیبی زندگی کا ایک اہم حصہ ہونے کے ساتھ ساتھ عملی سیاست میں بھی شریک تھے بلکہ بائیں بازو کے نامور رہنما بھی تھے ، فلمی دنیا سے وابستگی بھی تھی ، انھوں نے فلموں ، اسٹیج اور ڈراما کے لئے بے شمار گیت ، نظمیں اور نغمے لکھے۔

25/ اگست 1969ء کو دہلی میں آپ کا انتقال ہوا اور حیدرآباد دکن میں قبرستان شاہ خموش میں دفن ہوئے۔

تصویر / انقلاب

---

مخدومؔ محی الدین کا منتخب کلام

• پھر چھڑی رات بات پھولوں کی
• عشق کے شعلے کو بھڑکاؤ کہ کچھ رات کٹے
• گریباں چاک محفل سے نکل جاؤں تو کیا ہوگا
• آپ کی یاد آتی رہی رات بھر