رات آنکھوں میں ڈھلی پلکوں پہ جگنو آئے

ہم ہواؤں کی طرح جا کے اسے چھو آئے

میرا آئینہ بھی اب میری طرح پاگل ہے

آئینہ دیکھنے جاؤں تو نظر تو آئے

ان فقیروں کو غزل اپنی سناتے رہیو

جن کی آواز میں درگاہوں کی خوشبو آئے

بس گئی ہے مرے احساس میں یہ کیسی مہک

کوئی خوشبو میں لگاؤں تیری خوشبو آئے

اس کا دل دل نہیں پتھر کا کلیجہ ہوگا

جس کو پھولوں کا ہنر آنسو کا جادو آئے

خوبصورت ہیں بہت دنیا کے جھوٹے وعدے

پھول کاغذ کے لیے کانچ کے بازو آئے

اس کی آنکھیں مجھے میرؔا کا بھجن لگتی ہیں

پلکیں جھپکائیں تو لوبان کی خوشبو آئے

اس نے چھو کر مجھے پتھر سے پھر انسان کیا

مدتوں بعد مری آنکھوں میں آنسو آئے