واعظ یہ نہیں ہے وقتِ طرب اٹھ باندھ کمر دستار اٹھا

اسلام جہادِ اکبر ہے میدان میں آ تلوار اٹھا

کیوں تیری جراتِ حق گوئی سمٹی ہوئی ہے اک گوشے میں

اعلانِ جنوں میدان میں کر آواز سرِ بازار اٹھا

میں کنجِ قفس سے گلشن کا ہر آن نظارہ کرتا ہوں

جو چشمِ تصور کو روکے ایسی بھی کوئی دیوار اٹھا

دنیا میں رہ کر دنیا کے احوال سے غفلت کیا معنی

کچھ ذوقِ مطالعہ پیدا کر حالات کو پڑھ اخبار اٹھا

افسانۂ خیر و شر کے لئے موزوں نہیں بزمِ عیش و طرب

بے سود ہے قیل و قال یہاں یہ بحث تو زیرِ دار اٹھا

جس وقت ادب خوابیدہ تھا ہر شئے پہ تعطل طاری تھا

حالات نے انگڑائی لے لی جب خواب سے ہر فنکار اٹھا

ائے ساقیٔ محفل بتلا دے یہ مشورہ تجھ کو کس نے دیا

اوروں کے لئے پیمانہ اٹھا فطرتؔ کے لئے تلوار اٹھا