سامنے ہی تھے مگر بات نہ ہونے پائی

بے خودی تھی وہ ملاقات نہ ہونے پائی

ہم نے تہذیبِ غمِ عشق کو زندہ رکھا

زندگی شورشِ جذبات نہ ہونے پائی

بھیگیں پلکیں نہ کبھی آنکھ سے آنسو نکلے

دل جو رویا بھی تو برسات نہ ہونے پائی

ظرف پر آنچ نہ آئی کبھی رندی سے مری

زندگی نذرِ خُرافات نہ ہونے پائی

بات کرتے تو سرِ راہِ گذر کیا کرتے

اس تکلف میں کوئی بات نہ ہونے پائی

مانگتا اُن کو خدا سے میں دعاؤوں میں پیامؔ

شامِ غم صبحِ مناجات نہ ہونے پائی