ویران اور حسن کا منظر لئے ہوئے

اللہ رے دل تخیّلِ دلبر لئے ہوئے

میں لطف اٹھا رہا ہوں دل و دلنواز کا

آئینہ آفتاب کے رخ پر لئے ہوئے

کتنوں کو ہوش تک نہ رہا اپنے آپ کا

گزرے جو آپ زلفِ معنبر لئے ہوئے

خود پی لیں یا پلا دیں کسی تشنہ کام کو

کیا دیکھتے ہیں ہاتھ میں ساغر لئے ہوئے

خاکِ لحد میں سوئیں گے یہ فتنہ گر تو کیا

اٹھیں گے پھر یہ فتنۂ محشر لئے ہوئے

یہ مطربانِ بزم تو کچھ رازِ دل نشورؔ

ہیں پردۂ رباب کے اندر لئے ہوئے