اس نگاہِ ناز نے دیکھا حریفانہ مجھے

یہ تعلق کر گیا کس کس سے بیگانہ مجھے

مانگتا ہوں اپنے سوزِ عشق کی ہر وقت خیر

شمع میں جلتا نظر آتا ہے پروانہ مجھے

جلوۂ گل سے یہاں طاری ہے عالم دوسرا

موسمِ دیوانہ گر سمجھا ہے دیوانہ مجھے

بڑھ گئی حیرانیاں بھی جلوہ ارزانی کے ساتھ

تیرا ایک ایک آئینہ ہے آئینہ خانہ مجھے

اک نگاہِ مست کی اللہ رے کیف انگیزیاں

دردِ یک ساغر ہے میخانے کا میخانہ مجھے

ہر صدائے خندۂ گل پر یہ ہوتا ہے گماں

میرے منہ پر کہہ رہا ہے کوئی دیوانہ مجھے

تلخیٔ مے لذتِ کام و دہن ہے ساقیا

دے شرابِ تلخ پیمانہ پہ پیمانہ مجھے

اس طرح سنتا ہوں میں ایک ایک کی رودادِ غم

جس طرح کوئی سنائے میرا افسانہ مجھے

کون سی منزل ہے تابشؔ یہ جنونِ عشق کی

عرصۂ یک گام ہے ایک ایک ویرانہ مجھے